Actividaes didáctiques

A manera d'exemplu, recuéyense de siguío les actividaes que se realizaron con dalgunos de los grupos d'escolares que nos visitaron y que van tar en función de los medios personales y de los horarios de cada centru escolar.

El Molín

Esplicación sobre la so hestoria, la so mecánica y funcionamientu, los nomes de les partes o pieces, una amuesa de les distintes ceberes que se roturan y los sos nomes, rematando cola so puesta en funcionamientu, na que pueden reparar en vivu la carga de la cebera, los xiros de la muela, el choque ya impulsu del enagua sobre'l rodendu y la salida de la farina.

El Río Negru/Ríu Nigru

Dende'l pequenu prau asitiáu na trasera del molín, tol grupu de neñes y neños pueden reparar la canal o presa que lleva l'agua al molín y el río Negru/ríu Nigru. Colos más pequenos desenvuélvese una actividá que pretende ser al empar lúdica y educativa, que sigue una unidá didáctica qu'asemeya la carta unviada pola Xana “Adelina", con una hestoria sobre'l ríu, nel que vive, l'agua, los sos usos, la fauna, los peligros y la necesaria protección que los mozos tienen de faer de los nuesos ríos.

El Rabil o Pis​ón

Demostración del so funcionamientu ya información sobre la escanda, la perantigua variedá de trigu inda cultivada n'Asturies.

La Güerta

Un pequeñu percorríu por ella, con identificación de delles de les plantes y los árboles. A distancia reparen l'actividá de les abeyes nel colmenar.

L'Horru

Nel interior del mesmu imparten delles idees sobre l'usu al que se destinaben los horros, les sos pieces y construcción, amuésense-yos dellos preseos de llabranza, etc. Nel interior del horru, pueden vese, tocar y goler los productos y los instrumentos rellacionaos cola apicultura como cuadros con miel, polen, puesta, afumadores, al empar que s'imparten nociones sobre la importancia de les abeyes na polinización de les flores.

Visita a la Mina

Reparar percorriendo una distancia averada d'unos 2 km. pola Sienda Verde del Río Negru/Ríu Nigru, antigua vía de ferrocarril mineru na cual, ante una bocamina, danse esplicaciones sobre la minería, los llabores desenvueltos nel interior de les mines, los usos del carbón, los accidentes y enfermedaes de los mineros, col sofitu y exhibición de llámines, semeyes antigües y de llibros sobre la minería.