El molín d' Adela

El molín d’Adela ye un molín fariñeru de maquila, con dos mueles, asitiáu na cabecera d'una ponte de piedra sobre'l ríu Nigru, afluente del ríu Ayer, nel pueblu de Güeria, parroquia de Morea nel conceyu d'Ayer, n'Asturies (España).

Dende va años, los sos propietarios y anguaño l'Asociación "Molín de Adela", trabayen con ilusión nel proyeutu, lo que nos llevó a planteganos el molín, como daqué más qu'un oxetu d'arqueoloxía industrial-etnográfica, pa consideralu como Aula didáctica, como un espaciu pa la conocencia del mundu rural nel que nació y al que tanto aportó.

Como "un llugar" del campu y de l'aldega o pueblu con un fondu venceyamientu emocional pa los seres humanos y como fonte de la nuesa identidá que ta enllenu de significaos y de valores. Poro, los llabores d'espardimientu y conocencia del mesmu tienen de ser una prioridá, y al empar, estes conocencies tienen d'estendese al conxuntu d'elementos felizmente calteníos d'aquella antigua Casería constituyida por una quintana con casa, horru, el prau de siega o llerón, el colmenal, el güertu y de la que tambien formaben parte, el castañéu próximu al pueblu y la cuadra-cabaña del monte.

Nesti sen, la singularidá del proyectu qu'agora presentamos vendría dada por tar inspiráu na idea del “caltenimientu natural", que como conceutu acuñó Carl Sauer, en 1955. Trátase d'un intentu de conservar "les formes de vida al par del caltenimientu de la naturaleza", y supon tamién aceptar "que l'espaciu rural ta ensertu nun nuevu sistema de relaciones ciudad-campu y que les cultures de les comunidaes rurales pueden ser tresmitíes y sopelexaes emplegando los nuevos recursos educativos y les nueves teunoloxíes".